Posted in Bismark's Corner, Cave View, Na Don Hear?, Uncategorized

Na Don Hear?

Good day country people for obodo Nigeria, and a very big well-come to our oga Presido as e don carry Jet land our Naija (Sorry say rat and cobweb wey full office never allow you resume sir).
My name na Victor and I wan yarn una all the correct correct gist wey flenty for this our country and all around the world.
– She’s Just 12?

So this fine babe picture don carry leg waka for inside instagram o! And dem talk say make we no look the kain heavy overload wey she carry, say na only 12 years she don count for this world.
World people for the comment come carry mouth talk say even if she be -12 years, dem go still like run things with am. Make una sef check am o. Shild abuse!

– Reekado Banks don become Daddy Yo!

Baba Reekado Banks tell one ogbonge online TV station say e don become Daddy Yo! For all the girls dem. E follow talk say any status wey dem wan call am follow o, say if na Single, dating, searching, Married, all join naim e be. Oga Reekado Eku Ise o!

– House help turned daughter enjoys lavish wedding.

Country bad, country bad, e neva rotten finish. Naso one correct woman for this our obodo Naija don carry better money spend on top her Househelp wey she don turn to her own personal pikin. She spend this money sake of say the House help wan do wedding. Na God go bless that woman for all of us o.

– Timi Dakolo advocates for child education

Oga Timi wey dey host The Voice Nigeria don follow put mouth on top pikin education. Oga Timi put this picture con follow talk say make we dey spend better better time to dey teach our pikin o! Or else na when dem don become agbalagba naim we go dey try teach dem how dem go behave. Make I quote am… “SPEND TIME TEACHING THE CHILD NOW OR YOU WOULD SPEND YOUR OLD AGE INSTRUCTING THE ADULT ON HOW TO BEHAVE”.

– Asuu Strike

Meanwhile, our plenty plenty teacher wey dey lecture for university still dey follow do negotiation with government. Now wey baba don land, we follow dey pray say e go shaperly answer dem so that the tin wey oga Timi talk e no go be our portion.
Una know say tori plenty for this our obodo Naija na,.Na the one wey I hear naim I carry come gist una so o. My ear go dey ground dey gather more informate wey I go bring the next time wey I come. Till then make una dey enjoy o.